#ewig | Explore Tumblr Posts and Blogs

bluetheoristbeliever · 7 months

Text

SOLA SCRIPTURA

Gedagtes en verse oor GOD se WOORD

Die Aanslag teen die Woord

Van die begin af het die duiwel God se Woord aangeval. Gen 3:1 “... Is dit ook so dat God gesê het:” Dit is nog steeds die geval. Hy wil die fondamente van die Kerk verwoes. Ps 11:3“As die fondamente omgegooi word, wat kan die regverdige doen?” Moderne teoloë volg mense soos Bultmann wat sê dat die Bybel sy ontstaan te danke het aan mites as bronne. Verder ook Karl Barth wat sê dat die Bybel is nie ‘God se Woord’, maar dit word ‘God se Woord’ wanneer jy dit lees en stel gevolglik so die Bybel gelyk aan ander menslike geskrifte. Verder is daar selfs van die behoudende teoloë wat sê dat Genesis een net ‘kunsprosa’ is. Hulle kan eenvoudig nie aanvaar dat dit wat daar staan waar is nie. Dit maak plek vir die ‘Big Bang’ en die ‘Evolusie Teorie’ wat beide nie bewysbaar is nie en selfs natuur wette moet breek om te kon plaasvind. So word kinders dan ook geleer dat die Bybel stories is en dat die ‘Evolusie Teorie’ geskiedenis is. Die gevolg is dat die Kerk hierdie jong mense en baie ander verloor en dit kring al meer uit.

Daar is baie kerkleiers wat nie meer glo dat mense soos Adam en Eva, Noag en Jona historiese persone was nie. Hulle betwyfel ook die duiwel se bestaan. Verder glo hulle nie aan wonderwerke, dat Jesus uit ‘n Maagd gebore is en dat Hy uit die dood opgestaan het nie. 1Tim 4:1“Maar die Gees sê uitdruklik dat in die laaste tye sommige van die geloof afvallig sal word en verleidende geeste en leringe van duiwels sal aanhang deur die geveinsdheid van leuenaars wat gebrandmerk is in hulle eie gewete,” Hulle het nie meer eerbied vir God en die Woord. Die blye boodskap van die Evangelie word vervang met ‘n nuwe boodskap van ‘onvoorwaardelike’ liefde en ‘inklusiwe’ verhoudinge ongeag van die teks wat hulle gekies het. Bygesê dat hierdie onvoorwaardelikheid en inklusiwiteit juis sekere groepe uitsluit soos byvoorbeeld wat hulle noem ‘homofobiese’ persone, ook dolerendes, selfs ongebore persone en persone wat glo dat die Skrifte absolute waarhede bevat. Die liberale leiers noem die laaste groep dan ook fundamentaliste.

Die Bybel waarsku baie duidelik in baie gedeeltes oor hierdie dinge en daarom is dit geen verrassing dat mense bly ontken dat dit so is. Die Bybel is nie diplomaties daaroor nie en wys ook waarom God gevrees moet word. Jer 5:30-31“ ‘n Ontsettende en afskuwelike ding het in die land gebeur: die profete profeteer vals, en aan hulle sy oefen die priesters mag uit, en my volk wil dit graag so hê. Maar wat sal julle doen aan die einde daarvan?”

Jer 14:14“En die HERE het vir my gesê: Die profete profeteer vals in my Naam; Ek het hulle nie gestuur en hulle geen bevel gegee en met hulle nie gespreek nie; hulle profeteer vir julle ‘n leuengesig en nietige waarsêery en bedrieëry van hulle hart.”

Mat 7:15 “Maar pas op vir die valse profete wat in skaapsklere na julle kom en van binne roofsugtige wolwe is.”

Mat 24:11 “En baie valse profete sal opstaan en baie mense mislei.”

2Kor 11:13-15 “Want sulke mense is valse apostels, bedrieglike arbeiders wat hulleself verander in apostels van Christus. En geen wonder nie! Want die Satan self verander hom in ‘n engel van die lig. Dit is dus niks besonders wanneer sy dienaars hulle ook voordoen as dienaars van geregtigheid nie. Maar hulle einde sal wees volgens hulle werke.”

2Pet 2:1 “Maar daar was ook valse profete onder die volk, net soos daar onder julle valse leraars sal wees wat verderflike ketterye heimlik sal invoer, en ook die Here wat hulle gekoop het, verloën en ‘n vinnige verderf oor hulleself bring;”

1Joh 4:1“Geliefdes, glo nie elke gees nie, maar stel die geeste op die proef of hulle uit God is, want baie valse profete het in die wêreld uitgegaan.”

Sekere misleiers kan baie vroom en liefdevol voorkom sodat hulle mense se vertroue wen. Van hulle sê Calvyn: “Die huigelaars roem oor hulle vroomheid asof hulle ware dienaars van God is. Maar Christus sê dat hulle uiteindelik uitgejaag sal word uit die plek wat hulle ten onregte inneem.”Inst III, 24, 8Wat sê die Woord van hierdie valse profete? Hoe moet ons teenoor hulle optree? Die antwoord wat ons kry is as volg. Gal 1:8-9“Maar al sou ons of ‘n engel uit die hemel julle ‘n evangelie verkondig in stryd met die wat ons julle verkondig het, laat hom ‘n vervloeking wees! Soos ons vantevore gesê het, sê ek nou ook weer: As iemand julle ‘n evangelie verkondig in stryd met die wat julle ontvang het, laat hom ‘n vervloeking wees!”Die apostel Johannes is net so duidelik daaroor. 2Joh 1:10-11“As iemand na julle kom en hierdie leer nie bring nie, ontvang hom nie in die huis nie en groet hom nie. Want die een wat hom groet, het gemeenskap aan sy bose werke.”Wat verkondig word moet getoets word of dit waar en reg is, soos die mense van Berea gedoen het. Hand 17:11“En hierdie mense was edelmoediger as dié in Thessaloníka; hulle het die woord met alle welwillendheid ontvang en elke dag die Skrifte ondersoek of hierdie dinge so was.”

Daar is ‘n traagheid om die Skrifte te gehoorsaam. Mat 7:24&26 “Elkeen dan wat na hierdie woorde van My luister en dit doen, hom sal Ek vergelyk met ‘n verstandige man wat sy huis op die rots gebou het. En elkeen wat na hierdie woorde van My luister en dit nie doen nie, sal vergelyk word met ‘n dwase man wat sy huis op die sand gebou het.”

2Tes 3:14-15“En as iemand aan ons woord in hierdie brief nie gehoorsaam is nie, teken dié man en hou geen gemeenskap met hom nie, sodat hy skaam kan word. En beskou hom nie as ‘n vyand nie, maar vermaan hom as ‘n broeder.” Ware gelowiges sal nie dinge verdedig wat teen die Woord indruis nie. Uit die Woord is dit duidelik dat sulke dinge sal gebeur. 2Tim 4:3-4“want daar sal ‘n tyd wees wanneer hulle die gesonde leer nie sal verdra nie, maar, omdat hulle in hul gehoor gestreel wil wees, vir hulle ‘n menigte leraars sal versamel volgens hulle eie begeerlikhede, en die oor sal afkeer van die waarheid en hulle sal wend tot fabels.”So bring die mens ‘n oordeel oorhomself. Jes 3:4 “En Ek sal seuns hulle vorste maak, en moedswilliges sal oor hulle heers.” Is dit nodig om meer daaroor te sê? Hos 8:7“Want hulle saai wind, maar hulle sal storm maai;” Dit is presies wat gebeur. Gelowiges wat die Woord ken moet nie dwalinge aanvaar nie. Ef 5:14“Daarom sê Hy: Ontwaak, jy wat slaap, en staan op uit die dode, en Christus sal oor jou skyn.” Daar is baie waarskuwings in die Woord. Dan 12:2“En baie van die wat in die stof van die aarde slaap, sal ontwaak, sommige tot die ewige lewe en sommige tot groot smaadheid, vir ewig afgryslik.”

Die oorsprong van die Woord

Dit is baie belangrik dat elkeen seker sal weet waar die Bybel vandaan kom en nie net sal glo wat ander sê nie. Die beste plek om te begin is by 2Tim 3:16 “Die hele Skrif is deur God ingegee (geinspireer) en is nuttig tot lering, tot weerlegging, tot teregwysing, tot onderwysing in die geregtigheid,” Ingegee is vertaal uit die Griekse woord θεόπνευστος (Theopneustos) wat letterlik beteken deur God uitgeasem. Dit impliseer baie duidelik dat alles wat in die Bybel geskryf is uit God se mond gekom het. So word die Woord dan ook beskryf as ‘n swaard (Ef. 6:17, Heb, 4:12) en sien ons in Op. 1:16 “... en ‘n skerp tweesnydende swaard het uit sy mond uitgegaan, en sy aangesig was soos die son wat skyn in sy krag.”Dan weer in Op. 19:15 “En uit sy mond gaan daar ‘n skerp swaard ...”. Die Skrifte kom daarom uit die mond van God en is deur mense neergeskryf. Mat 4:4 “Maar Hy antwoord en sê: Daar is geskrywe: Die mens sal nie van brood alleen lewe nie, maar van elke woord wat deur die mond van God uitgaan.”

Heb 1:1 “Nadat God baiekeer en op baie maniere in die ou tyd gespreek het tot die vaders deur die profete, het Hy in hierdie laaste dae tot ons gespreek deur die Seun.”

Dit is duidelik dat God mense gebruik het om neer te skryf presies wat Hy wou hê dat hulle moes skryf. Rom 15:4 “Want alles wat tevore geskrywe is, is tot ons lering tevore geskrywe, sodat ons deur lydsaamheid en bemoediging van die Skrifte hoop kan hê.” So het God sekere mense toegerus en beveel om te Sy woorde neer te skryf. Soos ook vir Moses.Eks. 34:27“Verder het die HERE vir Moses gesê: Skrywe vir jou hierdie woorde op,”Petrus sê ook vir ons dat die Woord van God afkomstig is en nie van mense afkom nie. 2Pet 1:19-21“En ons het die profetiese woord wat baie vas is, waarop julle tog moet ag gee soos op ‘n lamp wat in ‘n donker plek skyn, totdat die dag aanbreek en die môrester opgaan in julle harte; terwyl julle veral dít moet weet, dat geen profesie van die Skrif ‘n saak van eie uitlegging is nie; want geen profesie is ooit deur die wil van ‘n mens voortgebring nie, maar, deur die Heilige Gees gedrywe, het die heilige mense van God gespreek.”

God se Woord is waar en ewig

Ps 12:7“Die woorde van die HERE is rein woorde, silwer wat gelouter is in ‘n smeltkroes in die aarde, gesuiwer sewe maal.”Die Woord is nie gebind aan tyd nie. Dit probeer ook nie om menslike kultuur te handhaaf nie, maar skep ‘n nuwe kultuur. Wanneer God se Woord betwyfel word, dan word God betwyfel. Ons kan nie die Woord losmaak van God self nie. Ons kan God ook nie leer ken sonder die Woord nie. Joh 1:1 “In die begin was die Woord, en die Woord was by God, en die Woord was God.”

Ps 119:89“Vir ewig, o HERE, staan u woord vas in die hemele.”

Ps 119:152“Lankal het ek geweet uit u getuienisse dat U hulle vir ewig gegrond het.”

Ps 119:160 “Die hele inhoud van u woord is waarheid, en al u regverdige verordeninge is tot in ewigheid.”

Jes 40:8 “Die gras verdor, die blom verwelk; maar die woord van onse God hou stand in ewigheid.”

Mat 5:18“Want voorwaar Ek sê vir julle, voordat die hemel en die aarde verbygaan, sal nie een jota of een titteltjie van die wet ooit verbygaan totdat alles gebeur het nie.”

1Pet 1:23-25“want julle is wedergebore nie uit verganklike saad nie, maar uit onverganklike, deur die lewende woord van God wat tot in ewigheid bly. Want alle vlees is soos gras, en al die heerlikheid van die mens soos ‘n blom van die gras. Die gras verdor en sy blom val af, maar die woord van die Here bly tot in ewigheid. En dit is die woord wat aan julle verkondig is.”

Joh 17:17“Heilig hulle in u waarheid; u woord is die waarheid.”

1Tim 4:9 “Dit is ‘n betroubare woord en werd om ten volle aangeneem te word;”

God se Woord is volledig.

Behalwe om die Woord te verdraai en te betwyfel kan daar ook bygelas word of daarvan weggelaat word. ‘n Halwe waarheid is erger as ‘n leuen. Deut 4:2“Julle mag by die woord wat ek julle beveel, niks byvoeg nie, en julle mag daar niks van weglaat nie;”

Op 22:18-19“Want ek betuig aan elkeen wat die woorde van die profesie van hierdie boek hoor: As iemand by hierdie dinge byvoeg, dan sal God oor hom die plae byvoeg waarvan in hierdie boek geskrywe is. En as iemand iets van die woorde van die boek van hierdie profesie wegneem, dan sal God sy deel wegneem uit die boek van die lewe en uit die heilige stad en uit die dinge waarvan in hierdie boek geskrywe is.”

Alles wat ons moet weet is daar vir ons in die Woord opgeteken. Soos die Woord sê ons is reeds volkome toegerus deur die Woord en daar is niks meer nodig om geopenbaar te word nie. 2Ti 3:17“sodat die mens van God volkome kan wees, vir elke goeie werk volkome toegerus.” Wie ook al nuwe openbaringe van God kry deur drome of beweer dat God direk met hom/haar praat is besig om by te las by die Woord. Daarmee sê hulle dat die Woord nie genoegsaam en volledig is om ons volkome toe te rus met alles wat ons nodig het om te weet. Die false profete binne die Kerk is soms persone wat dele van die Skrif ignoreer. Dit maak die deur oop vir ander dwalinge. So het sommige dan ‘n valse evangelie omdat hulle amper alles verkondig, maar laat dan uiters belanrike dinge weg soos bekering van sonde en slegte begeertes, belydenis daarvan en wedergeboorte. Dit is van die belanrike dinge waaroor hulle stil is. ‘n Goeie voorbeeld daarvan is die ‘Alfa’ kursus wat die ‘skerp punte’ van die Evangelie uitlaat.

Wat hulle leer is baie keer baie goeie noodsaaklike dinge. Dat mense soos Jesus moet wees. Sy voorbeeld moet nagevolg word. Deur goeie werke moet die wêreld glo verander word. Die werke moet wees uit dankbaarheid vir verlossing en nie om genade te verdien nie. Die mense word daardeur verlei sonder dat hulle dit agterkom. Dit is nie net baie eensydig nie maar word ook te ver gevoer. Dit is omdat die kern van die Evangelie verlore raak. Die klem skuif dan weg van God af na die mens, na wat hy is en wat hy doen. Dit staan strydig met wat Paulus sê: 1Kor 2:2“want ek het my voorgeneem om niks anders onder julle te weet nie as Jesus Christus, en Hom as gekruisigde.”Daar is dan niks van verlossing van sonde en slegte begeertes, die mense se gevalle natuur, wedergeboorte en bekering. Vermanings word nie gehoor, want hulle dink dit is sleg om te sê dat daar dinge is wat vir God ‘n gruwel is en dat die mens hom moet bekeer. Die mens staan dan sentraal en die bybelse opdrag is langs die pad verloor. 2Tim 4:2“verkondig die woord; hou aan tydig en ontydig; weerlê, bestraf, vermaan in alle lankmoedigheid en lering;”

Wanneer die Woord vir mense nie meer genoegsaam is nie, begin ‘n kerk ontspoor. Dit is ‘n proses wat nie ewe skielik nie gebeur nie. Daar word geleidelik van die Woord afgewyk omdat die Woord volgens hulle te ‘primitief’ of ‘onwetenskaplik’ geword het. Dit is soos die storie van die paddas wat in die water sit wat al warmer word totdat dit te laat is om uit te spring en so dood brand, omdat hulle nie agter gekom het wat aan die gang is nie. Dit is gevaarligte wat ons het. Dat die Skrif nie meer genoegsaam is nie en dat die klem al meer verskuif van God af na die mens. God word uitgeskuif as die middelpunt om die mens in die middelpunt te kry. God se wysheid word vervang met mense se wysheid. Spr 3:5 “Vertrou op die HERE met jou hele hart en steun nie op jou eie insig nie.” So word die Woord subtiel verdraai en ander kere weer openlik.

Waarom God se Woord bestudeer?

Ons kan eers negatief daarna kyk uit die Woord self.

Spr 19:2 “Selfs ywer is sonder kennis nie goed nie;”

Jes 5:13“Daarom gaan my volk in ballingskap weens gebrek aan kennis, ...”

Hos 4:6 “My volk gaan te gronde weens gebrek aan kennis; omdat jy die kennis verwerp het, sal Ek jou verwerp, ... “.

Mat 22:29 “Toe antwoord Jesus en sê vir hulle: Julle dwaal, omdat julle die Skrifte nie ken nie en ook nie die krag van God nie.”

Rom 10:2 “Want ek getuig van hulle dat hulle ‘n ywer vir God het, maar sonder kennis.”

Ef 4:14” sodat ons nie meer kinders sou wees nie wat soos golwe geslinger en heen en weer gedryf word deur elke wind van lering, deur die bedrieëry van die mense, deur sluheid om listiglik tot dwaling te bring;”

1Kor 2 15:34 “...want sommige het geen kennis van God nie. Ek sê dit tot julle beskaming.”

2Tim 3:7 ”wat altyd leer en nooit tot die kennis van die waarheid kan kom nie.”

Heb 2:1-5 “Daarom moet ons des te meer ag gee op wat ons gehoor het, dat ons nie miskien wegdrywe nie. Want as die woord deur engele gespreek, onwankelbaar was, en elke oortreding en ongehoorsaamheid regverdige vergelding ontvang het, hoe sal ons ontvlug as ons so ‘n groot saligheid veronagsaam wat, nadat dit eers deur die Here verkondig is, aan ons bevestig is deur die wat dit gehoor het, terwyl God ook nog saam getuig het deur tekens en wonders en allerhande kragtige dade en bedélinge van die Heilige Gees volgens sy wil?”

Die Woord is ook positief daaroor.God se Woord alleen rus gelowiges toe om met die Heilige Gees se hulp te strewe na gehoorsaamheid, onderskeiding en balaans. Alles moet wees uit liefde vir God, die Woord van waarheid, medegelowiges en ongelowiges. Geloof is ‘n vaste vertroue in hierdie kennis en geloof en gehoorsaamheid loop altyd saam. Net so moet waarheid en liefde ook altyd saam loop.

Ps 119:2-3 “Welgeluksalig is die wat sy getuienisse bewaar, Hom van ganser harte soek; ook geen ongeregtigheid doen nie, maar in sy weë wandel.”

Psa 119:59 “Ek het my weë oordink en my voete laat teruggaan na u getuienisse.”

Ps 119:105 “U woord is ‘n lamp vir my voet en ‘n lig vir my pad.”

Ps 119:133 “Maak my voetstappe vas in u woord,”

Isa 55:8-9 “Want my gedagtes is nie julle gedagtes nie, en julle weë is nie my weë nie, spreek die HERE. Want soos die hemel hoër is as die aarde, so is my weë hoër as julle weë en my gedagtes as julle gedagtes.”

Joh 8:32 “En julle sal die waarheid ken, en die waarheid sal julle vrymaak.”

Mat 13:23 “En by wie op die goeie grond gesaai is—dit is hy wat die woord hoor en verstaan, wat dan ook vrug dra en oplewer: die een honderd,die ander sestig—, die ander dertigvoudig.”

Joh 13:17 “As julle hierdie dinge weet, salig is julle as julle dit doen.”

Rom 10:17 “Die geloof is dus uit die gehoor, en die gehoor is deur die woord van God.

Rom 16:25-26 “Aan Hom dan wat magtig is om julle te versterk volgens my evangelie en die prediking van Jesus Christus, ooreenkomstig die openbaring van die verborgenheid wat eeue lank verswyg is, maar nou geopenbaar is en deur die profetiese Skrifte bekend gemaak is onder al die heidene, volgens die bevel van die ewige God, tot gehoorsaamheid van die geloof

2Tim 2:25 “Hy moet die weerspanniges in sagmoedigheid teregwys, of God hulle nie miskien bekering sal gee tot die kennis van die waarheid nie,”

2Tim 3:15 “en dat jy van kleins af die heilige Skrifte ken wat jou wys kan maak tot saligheid deur die geloof in Christus Jesus.”

1Tim 4:12 “... wees ‘n voorbeeld vir die gelowiges in woord, in wandel, in liefde, in gees, in geloof, in reinheid.”

1Joh 4:6 “Ons is uit God; hy wat God ken, luister na ons; hy wat nie uit God is nie, luister nie na ons nie. Hieruit ken ons die Gees van die waarheid en die gees van die dwaling.”

2Joh 1:9 “Elkeen wat ‘n oortreder is en nie bly in die leer van Christus nie, hy het God nie. Wie in die leer van Christus bly, hy het die Vader sowel as die Seun.”

Op 3:10 “Omdat jy die woord van my lydsaamheid bewaar het, sal Ek jou ook bewaar in die uur van beproewing wat oor die hele wêreld kom om die bewoners van die aarde op die proef te stel.”

God regeer sy Kerk deur die Woord. Daarom staan elke ware gelowige onder die gesag van die hele Woord.

Alle verse uit AFR 53 vertaling

#Bybel #waarheid #fals #verse #ewig

1 note · View note