#رمضان2020 | Explore Tumblr Posts and Blogs

light-intothedarkness · 4 years

Text

الرسول صلى الله عليه وسلم قال: “شعبان شهر يغفل عنه الناس”

احنا دلوقتي في شهر شعبان، بيفصلنا عن رمضان اقل من شهر وعندنا وقت والحمدلله في رخاء متوفر لينا سبل الراحة، فا نروق لنفسنا شوية ونسألها كام سؤال، من رمضان اللي فات ايه اللي اتغير في حياتنا؟ هل صلحنا عباداتنا او استزدنا من العلم عن ربنا؟ هل حالنا بقى احسن ولا اسوء؟ هل قربنا ولا بعدنا عن الله وعن الطريق؟

كل واحد عارف حاله و عارف “اين هو من الله” و من طاعاته، معظمنا الدنيا خدته ومعظمنا كان ماشي صح و وقع ومعظمنا بيجاهد عشان يفضل ثابت وفي اللي دايما بيستزيد مع مجاهدة و في اللي نفسه يبدء.

شعبان هو الفاصل اللي بنهيئ فيه نفسنا عشان ندخل رمضان و احنا مش مجهدين روحيا و جسديا، عشان رمضان الشهر الوحيد في السنة اللي ربنا بيضاعف فيه الاجور بغير حساب و بيدي ثواب للصيام لا يعد و ثواب تاني للصلاة المفروضة و ثواب تالت للنوافل و هكذا للصدقات و هكذا لأعمال الخير، و فيه ليله بمقدار 83 سنة، فا احنا محتاجين نستعد عشان فعلا نشتغل فيه صح فا ناخد الثواب المهم، ننقطع عن الدنيا شوية و ننشغل للاخرة اللي فيها حياتنا الحقيقية و مصلحتنا “ وما الحياة الدنيا في الآخرة إلا متاع “ و اكبر دليل على ان الحياة زائلة الظروف اللي حصلت من بداية السنة اللي فاتت، حجات كتير كنا فاكرين اننا منقدرش نعيش من غيرها و الحياة مشيت من غيرها.. ملهاش قيمة، ناس كتير و دول و مؤسسات كنا فاكرين ان ليهم قيمة كبيرة مفيش ليهم فايدة خالص، الموت للأسف موجود بنسبة اكبر من الايام العادية بسبب المرض فا ممكن الحياة تختفي في لحظة زي ما المرض ده جه في لحظة، مش ده كله يخلينا نفكر في ربنا الوحيد الباقي و الدنيا في زوال، الوحيد اللي عنده الثواب الابدي و الحياة الابدية؟

طيب ازاي ممكن ارجع تاني؟ و ازاي استعد لشهر عظيم زي رمضان ممكن بثوابه دنيتي و اخرتي تتصلح؟ احد الصالحين قال:”تعرف الى الله في الرخاء يعرفك في الشدة” تخيلوا معايا ان شعبان يمثل وقت الرخاء، و رمضان يمثل وقت الشدة يعني ايه؟

يعني اسئل نفسك انا ازاي اقدر استفيد من رمضان استفادة كبيرة و اقدر احصل ثواب على قد اقدر و تكون عباداتي بخشوع و احس بالروحانيات فجأة كده و انا مش مستعد لده كله؟ عشان كده للأسف الناس بتبقى في اول رمضان متحمسة اوي و بتزحم نفسها و بترجع تزهق و تبطل، ليه؟ عشان النفس البشرية طبيعتها انها متدرجة مينفعش مرة واحدة من النقيض للنقيض و مينفعش تزحمها بحجات هي مش متعودة عليها و ترجع تقول انا مش حاسس بخشوع ولا حاسس بروحانيات و زهقت حتى لو الزحمة دي متمثلة فقط في الصلاة و الصيام مش في عبادات تانية.

الإنسان يذهب في الأوقات الفاضلة (رمضان) وفي الأماكن الفاضلة(الحرمين) ليتفرّغ للعبادة لكنه لا يعان! لانه لم” يتعرف على الله في الرخاء فلا يعان في الشدة” و الكلام ده مينفيش ان في ناس بيتصلح حالها فجأة بأمر ربنا لانه قادر على كل شئ بس اغلب الحالات لازم نفسنا تكون مهيئة لاستقبال خيرات الوقت الفاضل.

كل واحد فينا عارف هو مقصر في ايه اذا في صلاة او علم عن ربنا و دينه او قيام او سنن او حتى الصيام بياخد وقت عشان يتعود عليه، او صدقات او عمل صالح عموما، ذكر ربنا، ورد القران.

نية الاستعداد لرمضان دي بتديك امتياز انه يارب بلغني رمضان بس حتى لو مأصبتوش او متت قبله فا انا اتكتبت اني اصبته باستعدادي ليه بقلبي.

اعتبر رمضان وقت معين او امتحان انت بتذاكر عشانه، عشان لو نجحت فيه تقدر تحصل اكبر قدر ممكن من راحة البال، الثواب، الشحن الروحاني اللي يعينني اكمل السنة و انا سليم القلب “من استعد استمد” و اعرف ان رمضان مليان نفحات كفيلة تغير حياتك 180 درجة.

خلينا ناخد شعبان كا شهر “للتكلف” اللي هنحس فيه شوية بتقل العبادة بس هنصبر على ده عشان لما يجي رمضان نبقى وصلنا لحالة “التألف” اللي نكون فيه خلاص اتعودنا و الصلاة او الصيام او النوافل او الذكر او القران يبقوا سهلين و ألفناهم، فا مناخدش رمضان اننا نتعود فيه لسه على الحجات دي فا على ما نتعود يكون رمضان خلص.

-راجع نفسك كده انت كويس عموما؟ ايه اللي محتاج تغيره او تزكيه في نفسك؟ ايه العبادات اللي مقصر فيها؟ علاقتك ازاي بالقران اللي ربنا نزله في الشهر الكريم عشان تهتدي بيه؟

- لو انت الى حد ما كويس في معظم الحجات اسئل ربنا انه يجدد الايمان في قلبك و يعصمك من الفتن و يثبت دينه في قلبك.

-طهر قلبك الا من ربنا خلي علاقتك بيه واحد الى واحد، يعني حاول على قد ما تقدر تتخلى عن اي قيود شغلاك و تقول بقلبك لا اله الا الله، و تسأل ربنا يطهر قلبك من الحجات اللي متستحقش التعظيم و التعلق بيها.

-احرس قلبك من الخواطر اللي بتوصلك لسوء الظن و حاربها باستذادة العلم عن ربنا، احرسه من الشحناء و الخصام مع غيرك عشان ربنا يرفع اعمالك له الشهر ده و يغفرلك، احرسه من انه يكون فيه ذرة كبر لغيرك، احرسه عن الغيبة و النميمة و التفكير في الانتقام من اي حد و احرسه عن كترة الشكوى لغير الله.

-و اهم حاجة داوم على العبادات اللي نفسك تكمل بيها رمضان، اتعود على الصلاة لو مبتصليش لسه، اتعود على الصيام صوم اتنين و خميس مثلا و الايام البيض، اتعود على ورد القران و لو صفحة كل يوم، اتعود على ذكر ربنا (استغفار-تسبيح-تكبير-حمد-حوقلة)، اذكار الصباح و المساء، قيام اليل بورد القران بتاعك، ابدأ اعرف ربنا باسماؤه الحسنى و شوف تدبر الايات اللي بتقراها في اليوم، طلع صدقات كل فترة، ساعد اهل بيتك.

و كل واحد ليه حرية الاختيار في النوافل انه يعملها كلها او يعمل اقل القليل عشان يقدر يكمل من غير زهق و كل واحد ادرى بنفسه و طاقته “احب الأعمال الى الله ادومها و ان قل”

و اعرفوا ان شعبان فيه يومين مهمين ممكن يجوا في اي وقت اليوم الاول اليوم اللي ربنا بيرفع فيه اعمال السنة كلها (الا المتخاصمين) واليوم التاني اللي ربنا بينظر فيه لأهل الأرض فيغفر لهم فانت اكيد تحب ان ربنا يرفع اعمالك و انت صايم او متصدق او بتسمع درس علم عنه او بتسبح و تطمع ان ربنا يخليك من الناس اللي بينظر ليهم و بيختارهم عشان يغفر ليهم و انت بتعمل طاعة خالصة له ابتغاء مرضاته لا رياء فيها ولا من او اذى ولا تريد فيها الا رضاه عنك، اللهم اجعلنا منهم.

اللهم بلغنا رمضان و ارزقنا صدق الاستعداد لرمضان، اللهم سلمنا لرمضان و سلم رمضان لنا، اللهم تقبله منا قبولا حسن، اعننا على ذكرك و شكرك و حسن عبادتك يا الله.

#رمضان #رمضان2020 #فذكر #شعبان

252 notes · View notes