sunshygal
墨爾本的太陽
雷震拿，最愛旅遊，無閒外遊便鑽進大街小巷品味咖啡；喜歡文字，閒來無事愛寫Blog，記錄眼睛觀察腦袋思索每個片段每闕心曲。兼職墨爾本旅遊大使，最愛襯色Mascara、花哩花碌靚絲襪，同埋藍天白雲陽光灑滿一地的世界最宜居城市墨爾本。
1531 posts
Don't wanna be here? Send us removal request.
Last Seen Blogs
rosyvennerjw
无标题
feyascorner
astarion’s left fang
technobumblebee
technoBumblebee
angrybatart
Bat's Art
Text
2020感恩篇之我的Lockdown年誌
每年來到年底，排山倒海而來的感恩會，總會叫雷震拿停下腳步好好思考，數算一年總結下來神大大小小賜予的恩典。在個人FB上分享了選舉工作的感恩事項，今天想談談疫情，記錄這年墨爾本抗疫路上的喜喜跌跌，所以將剛發佈了的個人感受，移師Blog中，與不認識我的新舊朋友，分享經歷，送上感恩話語。
首先，希望你與雷震拿的思想同步 --- 我的個人經歷，深信是神要我去領受，於我一定是有益的，但同一處境在你身上，未必有同一果效。即係講白啲講得直接啲，今日想講COVID，雷震拿感恩身處的環境安全神保守我們一家平安，我的感恩不單純是因為我哋冇中招所以好開心，而是為何神讓我活在一個（暫時）平安的地方，而當中又想我學習到甚麼，值得我去大大感恩。換個角度掉轉角色，舊年雷震拿患了大病，在旁人眼中是絕症，其他人可能會感恩自己冇病冇痛，但雷震拿大大感恩自己經歷了這次苦難，因為神不但擴張了我的境界，幫我升呢，更讓我在治病的過程中，感受到祂滿滿的大能與恩典。
Disclaimer講完，如果你明就明，如果你心嗰句係：「唓你哋零個案梗係口響，我哋日日幾萬人入醫院呀，仲講風涼話！」，Sorry，我諗你始終唔係太了解我嘅目的唔係講涼浸浸嘅說話，而係要聲大大開口述說神在我生命中的作為與恩典。
因為祂是配得極大讚美。
想先客觀地講講今年Melbourne係抗疫上面嘅功課。基本上我哋經歷咗兩次Lockdown，第一次係4、5月，第二次係7月中開始，直至10月中先慢慢解禁，而Melbourne所屬嘅Victoria維多利亞州，亦係全澳洲唯一一個要封城兩次嘅State，數字上係最高，但其實最多嘅新增個案嗰一日係687單，更多時候係百幾單。同世界好多地方相比，呢個數字唔係做得特別好，但絕對冇成千上萬咁恐怖。雖然從國際標準睇唔算太差，但由於比起其他州分高出太多，加上澳洲係防疫嘅策略上堅持要嚴厲嚴打嚴防，唔可以俾醫療系統爆煲，所以州長點都要做啲嘢......
結果，響雷震拿生日嗰日，州長宣佈宵禁，夜晚唔可以出街。Victoria唔單只有限聚令，基本上2020有好大段日子我哋係唔可以出街，要行出屋企門口必須符合四大理由 --- 購買必需品（根本上只有提供必需品商店先會開門）、一定要返工返學（大部分人都Work From Home同Study From Home）、睇醫生或照顧別人（Caring絕對係合理理由），同埋做運動（突然之間，你發覺人人都熱愛運動）。大家都習慣留響屋企，唔係一個禮拜，而係幾個月。雷震拿有朋友講笑話要鬥長唔出街，而事實上Melbourne已經刷新世界紀錄，就係Lockdown日子最長嘅城市。
世界最宜居城市變成世界居家令最長城市，諗落真係匪夷所思。當時雷震拿已習慣Lockdown生活，有時隔住Facebook望見居於世界各地嘅市民，竟然可以自駕遊、去旅行、開Party，睇新聞又見俄羅斯政治人物搭飛機懷疑俾人落毒，望見新聞片段個機場同架飛機坐滿人，講真，我有啲啲懷疑人生，呢啲係咪就係傳說中嘅平行時空？雷震拿忍唔住問朋友：「我哋日日百幾宗要留響屋企，但點解人哋日日幾千宗，仲可以周圍飛，生活好似如常咁嘅？」大家討論得出嚟嘅答案，推斷係因為我哋有個好嚴嘅校長。
總理呢位校長嚴謹落禁令，示範咗校規嚴格嘅標準。到隔離班即係其他州成績突飛猛進，個個7月開始慢慢回復正常，我哋班因為Quarantine Hotel呢壇功課做得唔好，俾病毒偷偷滲入民居，結果引發第二波，所以班主任即係落Order落重藥，個個都要罰留堂罰抄書罰做鴨仔跳。班主任隔兩個禮拜日就宣佈最新校規，例如全部人一定要戴口罩啦、唔可以出街剪頭髮啦、買嘢唔可以行出超過屋企5公里範圍啦、外出做運動唔可以多過一個鐘啦等等。
但其實有嚴厲嘅校長同班主任，都要有聽話嘅學生先可以完美配合，扭轉劣勢，反敗為勝。我記得有好多海外朋友好奇一問，究竟點樣確保市民留響屋企、唔聚會、唔偷走、唔犯規。雷震拿通常會話：罰得好甘囉！例如違反限聚令罰千幾蚊，後尾仲調高至五千幾，唔戴口罩就罰200等等。但其實罰款只係阻嚇，最大原因係澳洲一向奉行Honesty System，定咗個規矩，就期望你遵守。當然每個社會裏面總係有不同聲音，所以仍然有人違令，有人寧願攞告票都要出街，仍然有人召集抗議，但更多嘅係Sensible同奉公守法嘅好市民，佢哋明白忍一時同心抗疫嘅重要，而更多更多嘅人係唔忍心要老人家受苦。尤其是第二波疫情吹到入安老院，好多公公婆婆受感染過咗身，其他人就含住一泡眼淚教育身壯力健相對年輕嘅市民唔可以自私，要憐惜長者，體諒醫護......
就係咁，雷震拿同大部分Victorian一樣，好似喱響防空洞裏面嘅戰時平民，靠聽收音機知道政府公告，靜候何時太平，可以逃出生天。人人留響屋企，日日睇新聞，聽候校長同班主任落嘅Order。大家互通消息，緊貼資訊，了解究竟幾時出去買嘢架車可以坐多一個同屋親人，究竟今日可唔可以出街兩次一次做運動一次買外賣，確保唔好傻更更踩過界。
不知不覺，維州確診數字開始下跌，傳出第一日Double Donuts嘅好消息，即係零確診零死亡，更不可思議嘅係今日已經係連續第40日冇新增個案，數據上Victoria係Virus Free。雖然International Flight已經開番，接番Australians回Melbourne，預料開始會有外國輸入個案，但經歷咗上次酒店防疫不足嘅挫敗，相信今次"Hot Hotel"應該會做得更好。
用文字回憶了2020墨爾本的抗疫路，雷震拿感恩的事項除咗感謝神保守我們一家、親朋好友眾人，以至整個國家健康平安外，最感恩的是神容許我活在這個家。今年真的過得不容易，從報章新聞中看見了很多不認識的人艱辛的故事，但同時亦看見Melburnians團結抗疫的努力，這叫我真的很感動，亦很感謝天父讓我可以在這片天空下這塊土地上生活。在首次Lockdown時個人感受相對輕鬆，但很想念朋友，因為雷震拿係群體動物，未能與好友Face to Face吹水係好辛苦嘅，又要學習將所有交誼功課事奉溝通改為網上見，心裏雖然不願意，但我知道是神想擴張我們的境界，裝備我們迎接不可知的未來。到了第二次Lockdown，感覺是已經習慣離開群居模式，只是擔心疫情何時了經濟對國民的衝擊，那份感受就像在黑暗的隧道裏憑信心向前行。到第一個雙冬甩出現，仿如在隧道盡頭看見曙光，而現在雖然仍未穿過此隧道，但知道大家離終點邁向光明的日子不遠了。
所以當早前開始OO時小妹問「你哋嗰邊點」我答「成績好好連續好多日冇新個案啦」，而小妹講笑話「你知唔知點解，因為你哋天氣熱啦」，雷震拿要立刻轉Tone嚴正聲明發出一聲No！因為真的不能抹殺澳洲人的努力、合作與忍耐。問心，真係唔係好多人可以咁乖咁聽話咁都忍得到。
所以希望大家繼續努力！不管你正身處隧道那一方，神沒有忘記你，靠著祂堅忍下去，終有一天會走到盡頭，擁抱光明。
揀呢張相因為Lockdown令一家人共聚嘅時間多咗，感情更深厚，要為此大大感恩。此圖攝於母親節，雷震拿同憧憧講想食Tiramisu，佢專登偷偷揸車去Brunetti買，好乖仔。感恩當時係第一次Lockdown，冇5km Restriction。
1 note
·
View note
Text
肥貓浪遊記
今日，同各位分享一隻肥貓的故事。
話說雷震拿屋企附近有隻肥貓，成日自出自入，四圍走入人哋屋企個前院後院Catwalk，或者攤響鄰居個Driveway思考貓生，成團肥嘢無論係行嚟行去定係郁都唔郁，例必失驚無神嚇親人。
不過呢隻肥貓俾雷震拿訓斥過好多次，事關以前古爸爸話我知有隻貓成日走嚟嚇我哋啲雀，嚇到啲Budgie橫衝直撞撼玻璃，我已經嬲嬲地。後尾鬍鬚佬夜晚辣更，真係俾佢影睇咗肥貓嘅惡行 --- 佢竟然爬上個籠邊，四腳朝雀連埋個肥肚腩入鏡，擺到明係度兇啲Budgie！證據確鑿，雷震拿係唔會放過隻肥貓㗎！
皇天不負有心人，有晚返屋企一落車又見到佢響樹Catwalk。我當然唔會放過呢個機會，叫肥貓企定，俾Ms KU訓話足足幾分鐘，內容大致上離唔開：「我係唔會驚你」 同 「唔好再嚇我啲雀」 之類。不過唔知係唔係聽唔明廣東話，佢睩大對眼望實雷震拿訓話完畢後，喵一聲轉個身又去貓步行。
咁光陰飛逝時間流逝，雷震拿間唔中都會遇見佢巡場，大家互相喵一句擦身而過。再然後，早幾晚煲煲吓劇，突然聽見幾聲撕心裂肺嘅貓叫聲，好明顯有隻貓咪遇襲，鬍鬚佬話應該係碰上Possum。雷震拿開始擔心肥貓。
估唔到隔咗兩日，趁陽光普照出去行Walk，響街口就見到肥貓施施然過馬路行埋嚟。唔知佢係咪忽然掛住雷震拿嘅訓話，竟然停響我腳邊，仲索性坐低捲埋一舊等我開口。咁雷震拿當然唔放過呢個機會，立刻追問佢係咪俾Possum兇：「所以呢，都話他朝君體也相同😁😬，咪叫你唔好兇我啲雀㗎啦！」 不過雷震拿係真心關心佢㗎，所以加多句溫馨提示：「你下次要醒目啲，避開啲Possum吖嘛！」
今次我醒目啦，講完廣東話，講英文。✌️
訓斥完畢，雷震拿同肥貓講Bye Bye，繼續前行。點知肥貓拿林起身，跟住我行。為咗確定自己唔係自作多情，雷震拿試吓行前行後行左行右，肥貓都係跟住我，仲每次都坐響我腳邊。好Cute！衰鬼！
連啱啱經過嘅鄰居都停低架車，同我講話隻貓係咁跟住我，好得意。我問肥貓：「係咪扮Cute博Friend番呀？」
同姊妹分享肥貓啲相，有人話我知佢係Ragdoll品種，屬貴貓，又有姊妹讚佢可愛，不過要做下寵物美容😂😆...... 唔知肥貓個主人，有冇咁嘅打算？
1 note
·
View note
Text
停課大學生 + 頭籌老人家
近日疫情焦點由中轉移，西人世界個案不斷攀升，我哋由從前關心香港嘅親友，變成不斷接獲海外朋友慰問，多謝關心！我哋一家五口仍然非常安好，感謝天父。或者一向習慣Work from Home嘅雷震拿，一至五好多時候都響屋企，平日活動範圍都係上層、下層，上車轉左去附近嘅BSF，或轉右去Gym做運動，基本上同外面現實嘅世界，原來一直有所隔離。
不過疫情入侵，又點會冇影響生活？單單睇吓我屋企嘅老老嫩嫩，學業同烹飪事業飽受打擊，就知道疫症無眼。
陳憧憧陳圓圓由舊年11月中開始漫長暑假，原本3月第一個禮拜應該開學，但因為一早大學已經宣佈首周停課，次周網上教學，所以到尋日先終於可以開學啦！我家兩位大二學生晨早開開心心上學去，點知黃昏時拖著長長的身影歸家時，真的是懷著依依不捨的心情，因為：「停課啦！」（就係阿女一入屋就大嗌嘅一句）
真係一返學，就放假。
希望今個Semester唔使成個學期只係返得一日學啦！
至於古媽媽，好叻，外面大風大雨風聲鶴唳，佢都無要求過去超市撲貨。好人一生平安，真然等到好消息，就係Woolies帶頭將每日開門時頭一個鐘闢為長者專屬購物時段，只俾Senior入場。依我同陳憧憧嘅演繹：「即係好似如果你入住Universal Studios旗下酒店，咁每日早啲起身就可以優先入場玩哂啲熱門Rides！」
好人古媽媽今朝響專業司機鬍鬚佬陪同下，獨自行入間超市行使佢身為長者嘅權利。雖然都係要排隊入場，雖然有啲貨架都係空嘅，雖然都係買唔到廁紙，雖然都係要排長龍俾錢，但古媽媽好滿意，我哋全家都好感恩今晚有肉食。雷震拿仲慫恿佢星期四再獨自去Shopping，因為Woolies話星期三晚提早休息，以備專心擺貨。
疫境中，無論你想停課定恨返學，入到超市滿載而歸定空手而回，都希望你放輕鬆，唔好太緊張，但防疫措施千萬別鬆懈。祝你精神開心又愉快，身體健康又暢快。
0 notes
Text
愛在瘟疫蔓延時
好耐冇寫Blog，原本以為再寫會開始雷震拿抗病系列，估唔到家陣療程完結，打開電腦疾走鍵盤打出的心聲分享，竟然唔係個人由患病到醫治到康復的心路歷程，而係另一個我仲未惹到但不排除未來會成為確診一員的大流行疾病，咪就係Coronavirus囉！
基督徒百無禁忌，亦唔係自己咒自己，只係擘大對眼望清周遭情況，如果政府再唔肉緊啲，睇怕好難阻止病毒繼續擴散。你睇吓！連Tom Hanks都中招，真係講唔埋兼好難講。
對於曾經歷過沙士嘅雷震拿，講真，面對今次疫情，其實唔係好驚，心裏亦都好平安，因為深知如果容讓內心恐懼牽著個人情緒走，根本等於無視神的主權，亦等同忘記了凡事依靠父神此教導。只係生於疫世，難免感懷身世，尤其是我哋呢啲Torn Between Cultures嘅移民。
疫情開始蔓延時，我哋陪住香港親朋好友一同經歷，努力打氣，感謝科技發達，令我哋掌握更多有用資訊，亦學懂點樣篩選隔走漠視假新聞。衷心講句，雖然香港政府做得好差，唔封關仲大條講唔通嘅道理、撲唔到口罩俾市民亦明顯冷待站在前線守衛警戒線嘅醫護人員，但香港人真係做得好好，有罩齊齊分，緊守清潔法則，從前沙士慘痛的教訓，造就這次全民抗疫的齊心。如果唔係香港人守法守規事事小心，試問800萬密集人口點會只得百幾宗確診？真心一句：Well done！
離開手機屏幕，回到現實景況，我們身處的澳洲在病毒還未向世界邁進大流行時，一來陽光普照天氣炎熱感覺有助殺毒（冇科學根據，純粹個人每天呼吸感受），二來政府當機立斷宣佈封關，所以全國病例唔計鑽石公主號一直維持響15宗。但自從伊朗同意大利失守，加上美國感染個案增加，澳洲保持近一個月的15紀錄終於被攻破，因為我哋有大量伊朗移民，而往返美國航空亦非常頻繁。
與此同時，澳洲出現搶米搶意粉同埋搶廁紙嘅盲搶潮。放心，雷震拿冇搶埋一份，一來Super-Marketing唔係我職責範圍，而屋企負責入貨嘅鬍鬚佬處事作風一向定過抬油，二來揸筆搵食嘅我仲有分析新聞真正來源的辨析力，加上人不在超市，冇用對肉眼見過空貨架，所以冇咁易受影響吧！但眼見一向Laid-Back嘅Aussie都方寸大亂，雷震拿不無感慨。
或者有比較才不至於大失所望啩，問心我覺得澳洲政府至今為止仍算處理得不錯，只是病毒冇眼，實難以遏止，但起碼冇好似香港政府咁用義正詞嚴tone講埋啲不堪入耳嘅理由，亦冇好似安倍政府咁消極備炎只為奧運護航，又或好似Trump Trump咁自信爆棚偏偏阻止唔到疫症擴散。但令雷震拿最心噏的仍然是那份難以打破的文化差異 --- 就係究竟應唔應該戴口罩，同埋可唔可以全民保持社交距離。
每次收到香港朋友溫馨提示小心身體記住戴口罩呀等，雷震拿都唔知俾個乜嘢Sticker回佢先表達到我嘅心情。口罩呢家嘢，真係唔係你話想響澳洲戴就戴到。首先，唔容易買到，所以非常惜貨，第二，普遍外國人（用於澳洲就即係本地人）同我哋呢啲經歷過沙士然後隔住個Mon陪香港朋友經歷埋呢次肺炎嘅香港移民，對戴口罩嘅睇法真係差天共地。我哋響袁國勇同何柏良嘅敦促下，深信外科用三層口罩可有效隔阻病毒，所以戴口罩既為了自我保護，亦確保自己在不知情下如果正值潛伏期亦唔會散播病毒。但外國人普遍認為有病嘅人先應該戴口罩，澳洲版Yuen Kwok Yung同Ho Pak Leung亦話戴口罩冇用，所以要全民戴罩根本冇可能，如果你好地地戴住個Mask行街，啲西人反而會好嬲，覺得你有病點解仲四圍去？
咁你認為雷震拿會選擇戴，定係唔戴？
其實呢個對我嚟講並唔係重點，因為抗病半年嘅體驗，靚靚口罩從來不離身，當覺得身處地方危機四伏，雷震拿會極速笠番個罩自我保護，當時無論係西人定唐人都會用平時望住我啲絲襪嘅奇異眼光咁啤住我。但我理得佢呀，個身體係我嘅，好友親自為我縫製嘅口罩又咁靚...... 雷震拿想講出嘅重點係：響疫症下，互相猜忌、指罵、責怪嘅情況實在愈來愈多，例如戴唔戴口罩由個人選擇變成生死問題，但往往因為立場不同文化差異結果掀起對罵；又例如擔心中招所以左忌右避心裏生疑結果彼此忌諱逃避，傷了和氣兼影響感情，成為背負一生的疤痕......
你唔使估啦！以上感慨並非發生在身邊人身上，而是雷震拿透過面書看見的人生與百態。但有感而發造就身體力行去實踐用愛戰勝懼怕，所以個幾月前即使教會決定實施14日自我隔離令，雷震拿最終都無要求剛剛回澳嘅阿女去Ada姐姐樓下住，寧願同佢一切Quarantine，因為我接受唔到要當親人係帶菌者嗰份防避心態，既然愛佢就要愛埋佢有機會中招呢個可能。又例如啱啱專程自費買機票（因為原定墨爾本工作行程取消）都要飛嚟慶祝我完成療程嘅好朋友，問我介唔介意攬攬，雷震拿真係講唔出會介意，你對我咁好咁上心我點可能會嫌棄你猜度你有可能帶住病毒而拒你於千里？更何況家陣香港同澳洲確診個案不相伯仲，真係唔知邊個會惹到邊個！但雷震拿Confess，即使澳洲政府冇落Order，我日後都會少啲Touch避免過度親密，因為明白雖然我個心一啲都唔會嫌棄你，但總要接受你或者會嫌棄我太過熱情擔心我會散播病毒。
所以我已經練好一身Elbowshake與Footshake絕技，下次同你Shake Shake佢！
是日圖片1：攝於病毒出現前的Costco，雷震拿見人多當然要自我保護，咁嗰時未搶廁紙所以附近冇出現人潮，而個口罩，事後才知屬造型用系列。
是日圖片2：攝於早前雷震拿每兩星期要去兩次嘅醫院。本人覺得寫得非常中肯，尤其是「戴口罩係個人選擇」呢一句，希望大家由愛出發，多些體諒，少些爭拗，愛在瘟疫蔓延時。
0 notes
Text
我現在非常認識Sheriff啦！
真人真事疑似電話騙案點知堅過石堅之雷震拿大戰追債阿Sir。
話說雷震拿返醫院見醫生，一上車鬍鬚佬部電話就響，陌生來電顯示，一聽係個態度非常友善嘅男人，問我哋XXX XXX係咪我哋架車？係咪泊咗響Monash？架車應該唔係你揸啦，睇怕你俾咗個仔揸啦，你個仔係咪響Monash讀緊書？你以前屋企係咪響XXX，家陣就住響XXX呀？
吓！起哂我底！仲知我有個仔響邊度讀書，唔通你綁咗我個仔！😳🤯
咪住！我冇聽過猜猜我是誰有西人講英文㗎喎！
我唔記得話你知，其實佢有自我介紹，係Sheriff Victoria嘅乜乜乜。乜嘢Sheriff呀！美國就話有啫，我未聽過澳洲有Sheriff喎！你唔好當我係尋常C9，我有睇報紙㗎！
後尾再問清楚，原來佢話我哋係X年前有兩張過期罰單未俾錢，咁啱俾佢發現我哋架車，所以佢要鎖車，除非我哋即刻清咗條數，咁佢就可以解鎖。
仲唔係電話騙案！
雷震拿同佢講我係唔會走數嘅，無可能會冇交罰款。佢話：「唔出奇呀！好多人都係咁！因為張單寄咗去你舊屋，所以你冇收過！」咁仲離奇，點解張單會寄去舊地址（同搬屋日期相差兩年），但我明明去咗VicRoads改地址。
佢話：「係呀！好多人都係咁！不過我已經幫你Check咗，你響Police同VicRoads個地址家陣都Update咗㗎啦！」
真係非常可疑。
響佢繼續慫恿我快啲俾錢嘅同時，我同佢講：「我唔可以無啦啦接個電話就俾錢個陌生人！」於是阿Sheriff就立刻E貓咗我佢口中嘅Invoice... 唔睇好哋哋，一睇把幾火！張單原始到好似中學生功課咁，我索性同佢講：「我要時間去Verify，因為你張單實在太求其，我要問律師意見。」（平時雷震拿睇C9劇啲主角通常都係咁講）阿Sheriff話：「你即係唔信我啦！」「真係唔係好信，你唔可以怪我，呢個世界有太多Scam！」佢笑哂口：「OKOK，我明我明！」總之我同佢講：你唔好走住，俾5分鐘我。
最後係10個5分鐘。😬
響電光火石間，雷震拿立刻Call陳憧憧去車場查探虛實，轉頭急電律師老友幫手Fact Check同埋Call Police問個明白，自己就上網了解究竟Victoria有冇Sheriff嘅呢......
下刪10,000字同個零鐘頭嘅折騰，答案係：維州原來真係有Sheriff's Office，Sheriff原來唔係警長，係司法部負責收數嘅，平日得閒周街行，見車就Scan，發現有逾期罰款未交，係有權鎖車，直至車主補交欠款為止。
至於負責去現場探虛實嘅陳憧憧，同佢阿媽匯報：「Mum！應該係真㗎！」因為有警察Pass、有文件、有制服，仲有埋警車𠻹！不過有睇新聞嘅C9係唔會咁輕易罷休㗎！陳憧憧響佢阿媽下令下，影低咗阿Sir嘅Pass、睇哂所有文件，但為咗等阿律師Say Yes俾錢，只好同阿Sir打牙骹打足成粒鐘，兼夾反映咗成件事好無道理因為罰單寄咗去個舊地址，而阿Sheriff又回應話自己嘅職責係負責收數，出單同追數係另一個部門嘅範疇...... Well！非常Typical嘅澳洲現況。呢點冇可疑。
總之成件騙案嘅大結局，就係響阿Sir話唔等啦因為要去另一間屋收數，加上阿仔終於收到綠燈通知後，順利代佢阿媽俾錢告終。而個鎖，亦都即時解咗，可以放學啦！
下次如果你見到阿Sheriff，記住佢哋係堅㗎！費時又好似雷震拿咁阻住阿Sir做嘢啦！
0 notes
Text
祝福裡的琢磨
終於回家了！
「耶和華說：我知道我向你們所懷的意念，是賜平安的意念，不是降災禍的意念，要叫你們末後有指望。」（耶利米書29:11）
自從星期三古爸爸不辭而別後，雷震拿收到很多慰問（感謝大家，心領神會，心存感動），亦感受到很多刻意不發的慰問（同樣心領神會，心照不宣）。這數天滯留倫敦，九年前那幕因為冰島火山灰令機場停飛，我們仨被迫困於霧都，未能如期回家的經歷竟然又再重演，但這次雷震拿驀然發現，原來自己在這九年間真的不知不覺在靈性上成長了，變得紥實了。多謝面書，記下了我當年心情，每年重讀，都會為自己的小信而汗顏...... 當時很想很想第一時間離開，掏盡所有方法要爭取逃離英國。但這次，感謝聖靈賜出乎意料之外的平安，知道機會渺茫，淡然應對，只全然信靠天父，同時感謝小妹可第一時間由日本飛撲澳洲，代為照顧家人。
只是心裏很記掛古媽媽。
真心感謝神。想不到九年前的痛苦經歷，不知不覺間竟磨練了雷震拿依靠神的意志，天父要擴張我們的境界，在那時看似艱辛，但於我們絕對有益，因為祂對我們所懷的是平安的意念，定意要祝福我們。
在倒數周五原訂航班的時間中，我們越洋籌劃古爸爸的安息禮，感謝各方各國姊妹好友親人弟兄的協助，還差點點，便可確定細節。除了回覆慰問信息，思考大小細節外，我們仨多了更多比平日更深入更坦誠的傾談時間，更常常懷緬起古爸爸的點點與滴滴。我問鬍鬚佬：三天了，混亂的思絮開始沈澱了吧！你會怎樣形容你對Daddy突然離去的感覺？
鬍鬚佬說：「你那篇訃聞說我們仨的行程要無疾而終，但事實『無疾而終』的是Daddy。沒有「疾」病，說走就走，地上生命告「終」，天上永生延續。但Daddy能在這世上活上80歲，瀟灑告別，瞬間在天堂與耶穌永遠在一起，不是最好、最夢寐以求的事嗎？」的而且確，這是我心底裏認定的看法，我很明確知道這不是自我安慰之言，而是實實在在，對古爸爸來說最美好的畫面 --- 沒有痛苦，不須經歷病患，沒有太多遺憾未做過的事，亦知道我們日後會在天家重聚，這的確是好得無比。
「我的感覺是：這一天，終於來臨了，而現在我們便得去面對。」鬍鬚佬總結。的而又且確，雙親健在的每一人，即使如何不想，亦總要面對父母百年歸老的一天，只是不知道這一刻何時出現，怎樣出現。天父定意要我們這個家庭經歷的，是瞬間失去古爸爸，出其不意，事出突然，但這是祂的旨意，於我們絕對有益，因為祂對我們所懷的是平安的意念，定意要祝福我們。
聽完鬍鬚佬的分析，來到雷震拿的剖白：「感覺很複雜，很難完整描述，到這一刻我也找不到一個很精準的形容詞去表達我的深層感受。只可以說：不是傷悲，亦不是心痛，更絕對不是擔心。平安大於一切（深深感謝神），但當中混和極大不捨。對！是不捨得這個可愛、可親、勤奮、勤學的至親。」說了這麼多，那個精準的形容詞還是未能浮現，我告訴鬍鬚佬：「我要寫一篇Blog，因為每趟我的腦袋有太多感受想法未能逐一抽絲難以清晰排列，我得靠『表達』來將思絮好好整理（因為我是一個Expressive的人），文字是我『表達』的途徑。」
所以我打開電腦，寫下了這篇千字文，行文至此，感謝天父，聖靈剛剛告訴我這個精準的字句，是「順服」。
的而再三且確，面對古爸爸不辭而別、無疾而終，雷震拿心底裏的感受，是「順服」。如果我可以選擇，我會選擇讓古爸爸突然離去嗎？當然不會！我當然希望他能夠長命百二歲！但他的離逝是鐵一般的事實，那我會選擇質問神、埋怨神、質疑神，或怒恨神嗎？更大大不能！因為我深信神的旨意高於我們的旨意，神的計劃是最美好最完美的，我只能「順服」，而這「順服」並沒有夾雜無奈、被迫，更不是自我催眠、自我看化，而是被平安、安慰環抱，被期盼、希望注滿。相比起2010年火山灰對我們仨引起的不安、2011年地震海嘯對我們家族帶來的衝擊，這份出乎意料之外的平安，令雷震拿在2019年面對比生離更難受的死別時，安然不絕。
因為我們深信神對我們所懷的是平安的意念，祂定意要祝福我們。感謝天父。
希望你也能抓緊這福份。
0 notes
Text
VCE陳憧憧的快樂選科
除咗唔做唔知身體好，望吓個仔，不得不說一句：唔想都冇得唔認老。眨下對眼，陳憧憧已經由啱啱嚟澳洲時嘅Preppie，小學畢埋業；再眨多對眼一下，突然巨人憧已經Year 12，今年要考VCE，仲要係考試前選定大學學科。
雷震拿雖然係獅媽，配合近日熱話，卻從來冇強迫個仔讀醫或Law，係選讀乜嘢科目方面，完全支持佢嘅決定同喜好。事實上，無論係揀小學定揀中學，我哋都冇掙扎過亦冇選擇困難症，係天父爸爸帶領下，只係Apply咗一間，結果正正遇上最好的學校最佳的年份最Top嘅老師，大大感恩。轉眼嚟到揀大學，我哋亦秉承簡簡單單單單純純的心，早兩年阿仔Year 10時全家出動去參觀大學Open Day，陳憧憧���喜好按成績作出了選擇，雷震拿鬍鬚佬亦大力支持。舊年憧憧單刀再出擊，得出結論都係一樣，所以響雷震拿心目中，已坐定粒六，自我心理調校，幻想阿仔未來的大學生活，將出現如此這般的美麗構圖......
點知早幾個星期的Open Day，陳憧憧與其中一間大學某院校的Dean一席話，徹底改變了原有想法，突然多出了意想不到的方案。雷震拿承認，呢幾個禮拜我個人有啲亂，因為做咗40幾年人，都未試過響Make Decision方面出現賽前變陣、千變萬化的局面。雖然我未試過，但無須我應變，因為負責做決定嘅係陳憧憧。按阿仔嘅說法：「Mum! 我一啲都冇Confused，因為由頭到尾，我都知道自己要讀乜嘢，以家只係唔知揀邊一間Uni，同埋唔知點樣嘅Combination。」
對！Confused嘅係我唔係佢，但要面對選擇、分析查探、思考傾談、落實扑槌嘅卻只係佢，唔係我。雷震拿只可以引導、聆聽、傾���、抽絲剝繭，從旁打氣，並肩禱告。雖然個心好著急，但我唔可以強迫佢用我嘅方法我嘅選擇，因為未來要開展大學生活嘅，係陳憧憧，唔係雷震拿。
感謝天父爸爸，雷震拿只係經歷短暫混亂時期，好快就知道要放下自己。早輪陳憧憧去了另一大學Open Day，回家途中打電話俾忙於教會大掃除的雷震拿，向我訴說了自己的感受，以及響開放日嘅得著，雷震拿亦分析了從家長角度的意見，以及隱藏內心的擔憂。呢次坦誠的對話，打開了一道溝通之門，我為孩子尊重我的感受認真看待我的意見而感恩，更為他牢記我的分析與擔憂，然後積極尋找答案而開懷。
感謝天父爸爸帶領，阿仔再努力埋首大學揀科資料，多了嶄新想法，然後相約學校的Career Consultant商談，將自己的睇法與老師商討，亦嘗試將母親的擔憂攤出嚟講，以尋求現實世界的回應。結果陳憧憧與老師一席話，解開了心中的疑團，既Reconfirm了他的新想法，亦Inspire了一個新思路，最終讓他落實了一個嶄新的決定。
雖然最後方案，VCE陳憧憧計劃選修的大學科目與源自Year 10的理想有所出入，但理念一脈相通，即使不是雷震拿予想中的構圖，但看見孩子為自己前途著緊認真，既尊重爸媽意見，又堅持自己原則，同時積極掃除家長心中疑慮，我深信，這是天父爸爸的帶領。只要是祂的心意，His will is higher than ours，我不但順服，且歡天喜地感謝祂親手拖帶，讓孩子與祂建立屬於祂與他的關係。
0 notes
Text
旅遊拾趣之又「不是美女」
墨爾本的太陽出走三星期，先來一趟與八位好姊妹的九頭身東京旅行團，中間夾了一段不長不短一人前日本之旅，喜出望外地遇上了東京與京都兩處櫻花滿開美景，再回到香港出席母校同屆舊生聚會，回家前經過獅城短遊兩天，我稱之為掃食新加坡，掃街搵好嘢食嘅掃。
雖然這趟旅行沒有鬍鬚佬同行，但秉承其「拾趣」精神，雷震拿決定在此零零碎碎記錄這三星期旅行期間遇上的濕濕碎碎開開心心O嘴K怪旅遊事。
第一宗刻骨銘心拾趣事，就係傳說中的「Bu Shi」美女。話說我們九頭身九個女仔挑了台場Grand Nikko酒店，日日早出晚歸都冇機會望真啲附近美景。所以響某日賞櫻之前，決定去影下彩虹橋啦！自由神像啦！咁啦！話哂我哋都係成長於Love Generation的木村年代...... 咁正當阿攝影大師安妮響度Set緊機自拍的同時，有一位操普通話嘅大叔企響佢隔離，舉起機，大大個鏡頭對住我哋。
本能地我哋八個立刻起身，差唔多同一時間同佢講：「你唔可以影我哋㗎喎！」連雷震拿都自然衝口而出講煲冬瓜，可想而知，我哋嘅自我保護意識幾咁強（啲放逐我哋出外嘅LK可以放心😁）。但阿大叔笑笑口，繼續...... 舉機！我真係冇諗過有人會響八個加一個（即係連同企響佢身邊嘅安妮）女人明確Say No的情況下，會完全當無事發生，繼續我行我素。阿大叔真係非常率性，自我，不落俗套。
咁九頭身再度出聲叫佢停，阿大叔繼續唔聽，笑笑口話：「我在對焦，我在對焦」。阿安妮話好想提醒大叔一句，影相呢，如果想對焦影風景，前面企咗成排人響度，你係對唔到焦嘅。不過呢個時候，阿大叔個老婆出手啦！
「叫你走你就走！還在這裏做甚麼！你這個人真是！」單睇呢幾句對白，係咪完全掌握到阿大媽威嚴中帶點激動嘅表情同語氣呢？
懾於老婆嘅獅威，阿大叔立刻死死地氣放低部機行返去老婆身邊。你以為九頭身極力爭取肖像權呢單官司終極勝訴嗎？朋友，你太唔了解大媽了，大媽係無可能俾自己輸嘅。呢個時候，佢又出手啦！
「有甚麼好拍！又『不是美女』！」
雷震拿要承認，當呢四粒字走入我耳仔時，潛意識只係聽到美女兩個字。後尾覺得唔多妥，好似多咗兩個字喎。但我真係唔敢相信自己嘅耳仔，因為我以為阿大媽係企響我哋女人呢一邊㗎嘛！於是雷震拿問身邊位姊妹：「佢係咪話我哋唔靚呀？」阿姊妹一半忍笑一半翻白眼🙄️，回：「係呀！『不是美女』呀！」
如是者，「Bu Shi」美女成為我們是次行程的眾多口頭禪之一。大家自嘲也好，互嘲也好，得啖笑。
其實雷震拿真係一啲都冇唔開心，因為一個人的自我價值不在於陌生人隨便說出的一句話，更何況難道我們來到今日這年紀這境界還真的以為自己是或在意自己是否美人麼？雷震拿只係勞氣，勞氣在於影人相已經唔啱，仲要出口傷人來令自己處於高峰，我唔夠認同呢種態度同做法😑。成件事非常非常小學雞，激氣。
不過九頭身係唔會俾無謂的人無謂的事影響我哋去旅行開開心心癲癲狂狂的心情。但神真係好好，呢個故事有下集，神透過半個鐘後發生的另一件小事，話俾我哋知，我哋呢九個「Bu Shi」美女，其實好得人鍾意😍。下次再拾趣。
0 notes
Text
索拉奇Toruk
雷震拿一旦喜歡一樣嘢，就會不斷重複去做，去重溫，去回味，去尋回那份愛的感覺。去日本如是，食同一款菜亦如是，同樣道理，睇索拉奇都係一樣。
我知，索拉奇唔再係索拉奇，甚至從來都唔係索拉奇，全名應該係索拉奇藝坊 Cirque du Soleil，音譯意譯嘅極致。因為貪順口同好聽，所以係我N年前第一次響維園睇Alegria開始，已叫佢做索拉奇，亦因為被佢嘅技藝同華麗所吸引，所以咁多年嚟都追住佢啲Show嚟睇，由索拉奇變咗太陽劇團，由香港移民到澳洲，甚至去日本同美國都專登去捧場，至今嘅最愛，仍然係冇人能及嘅水中雜技鼻祖作Las Vegas嘅O。係呢十幾年嘅變遷中，老老實實，索拉奇嘅變化，根本唔多。趣味依舊，技藝仍超凡，刺激度亦高，但對於長期觀光客嚟講，新鮮感無疑已不斷在折舊中。
但原來有啲嘢，求變亦未必能滿足你心底裏的期望，變完再計數，追求的原來就是本來那一個。呢句說話雷震拿係送番俾自己嘅，皆因今年先後睇咗兩齣索拉奇出品，一齣係年頭響Flemington馬場做嘅Varekai，另一個就係啱啱尋晚開鑼嘅Toruk。其實早幾齣澳洲上演嘅索拉奇，已有點點悶意，但估唔到Varekai再度帶嚟驚喜，我哋一家六口齊齊去睇，六個都睇得好開心好滿意，令雷震拿重燃對索拉奇嘅愛火。但其實世界巡迴並唔係跟劇目時間表，正如呢齣Varekai，首演已經係2002年嘅事，今年底都就快Farewell Show，你話佢精彩，亦可以夾硬話因為係舊作，所以先至好。
咁嚟到11月，難得又有新作上演嘅？明明平時係年幾兩年先巡迴落嚟澳洲㗎。再睇睇場次同場地，點解咁Grand，升級去Australia Open Grand Final都係個度決一死戰嘅Rod Laver Arena嘅？即時感覺：個場咁大，點做呀？再研究，乜只係做七日咋？平時Cirque du Soleil都會自己搭個黃藍間條招牌大帳篷，一做就做兩個幾月，帳篷裏面賣吓紀念品，方便觀眾行嚟行去逛吓傾吓影吓相打吓卡...... 於是雷震拿深入研究，原來Toruk係索拉奇一個新嘗試，豪華版，劇場版，故事版，用Avatar居住嘅Pandora星作背景，講電影故事發生前嘅事，預計會有好多特別視效，同埋精彩索拉奇式雜技匯演。
注意：以上呢段最後一句，係雷震拿自己想當然地加上去嘅。就係因為太take it for granted，預設期望太高，結果，失望而回。
失望第一炮係氣氛，係完全冇哂！今次係現成場館，冇咗帳篷個份熱鬧嘅馬戲團氣氛，連Merchandise都係縮入大會指定框框內，冇得自由摸自由揀，有點兒無癮。然後失望第二炮來自演出本身，等雷震拿Copy & Paste私人FB內的Status搬字過版過嚟複一複先：
「純粹個人感受：其實鍾意睇索拉奇，即係Cirque du Soleil，又即係太陽劇團，都係因為鍾意睇佢嘅高難度雜技同超合拍動作，飛嚟飛去你來我往擘大個口目不暇給，你放大咗升級咗瑰麗堂皇咗再加強埋個故事性，反而令身為觀眾嘅我，對眼嘅Focus唔知應該擺係邊。加上舞台大咗樓底高咗成個Dimension放大咗，無錯，視覺效果同道具機關的確做得出色，但成班演員跳得再高轉得再勁，視覺比例上帶嚟嘅震撼力，始終唔及傳統帳篷版。更何況成晚其實都冇乜索拉奇式奇人奇藝元素，所以雷震拿有啲失望。
睇咗幾個字，忍唔住同鬍鬚佬講：『死啦！我覺得有啲悶。』
我知鬍鬚佬會安慰我叫我用睇大堆頭Musical嘅心情去欣賞，唔好諗住嚟睇馬戲。但我想講：『咁Aladdin真係好睇好多吖嘛！』
所以，其實錯嘅唔係索拉奇，而係我呢個忠粉，錯在我放錯期望，亦錯在我曾經怪佢自我重複方程式冇長進，事實證明，我都係鍾意原來嘅佢多啲啲。」
0 notes
Text
《旅遊 · 拾趣》之「露台晾底褲」
今轉旅行，鬍鬚佬教識陳憧憧陳圓圓兩個中文字：「拾趣」（注意：唔係十個趣...... 係囉！佢哋以為囉！😜）隨行，隨拍，隨想，邊旅遊邊拾起一些有趣的觀察深刻的睇法，正是穿越地球放眼世界的另類樂趣。
原本係拾起當地文化，豈料被旅客「率性自我」行為嚇襯。話說來到瑞士琉森，雷震拿刻意挑了一間面向湖泊的酒店，推開窗戶，即見酒店私家草地，以及仿如擁抱著湖泊的Pilatus山，超靚，好平靜，冇人大叫，非常舒服。雷震拿忍唔住自己讚咗自己一句："Good Choice!"
就係我們仨享受緊眼前如詩似畫美景同寧靜悠閒氣息的同時，鬍鬚佬突然後退三步，捉住我手臂，好明顯，忍笑忍得好辛苦！
「你睇！隔離......」
即係如果你將手機鏡頭設定為Panoramic，然後開始由左至右拍攝眼前草地湖泊山巒景緻，Pan到去右邊..... 哎喲！點解有幾件衫，同埋有條底褲嘅？😳😮😵
又可以完美教導陳憧憧呢個四字詞：「大煞風景」了！😑
其實好多時去旅行，啲酒店都會溫馨提示：請勿在露台晾衣物，即使酒店冇白紙黑字寫明，呢個世界有樣嘢叫禮儀Etiquette，即係響不同場合，都有不同守則應該遵守，尊重別人亦尊重自己。好似呢間唔係Resort酒店，冇人著住泳衣Beachwear隨處走，自然亦唔expect你將泳衣掛響窗口露台晾乾。加上酒店房間咁低層，同草地範圍又咁近，晾衫已經好肉酸，影響酒店整體觀感，同埋...... 無論係住客定訪客，其實真係唔係好想望見閣下如此私密嘅個人物品囉。
Just a long note to jot down some interesting things we came across during the journey. This time I would like to bring out the importance of "etiquette" while travelling, including what you shouldn't do in a hotel room. Yes. Please don't hang your clothes, esp undies in your balcony or window. It's really an eyesore to the hotel, to the passers by, and to the guests staying nearby.
(Photo taken in a beautiful lawn & lake facing hotel in Lucern)
0 notes
Text
迎送生涯
唔好諗錯隔離，無論係迎接，定係送行，都只係為個仔。係囉！就係澳洲媽媽每日例行工作，車出車入接送細路。
昨天與同事說起，雷震拿話雖然好多阿媽會投訴啲小朋友好困身，為咗照顧佢哋，冇咗好多自己時間，但以一個經歷過小學依賴階段，過度緊中學可以自行搭車半獨立過程，兼夾開始特訓個仔駕車準備踏入自由自在自駕起飛歷程嘅阿媽，雷震拿心底裏嘅感言係：「我知我會好掛住呢段迎送生涯」。
無錯，我哋冇工人姐姐可以幫手孭住個書包拖住隻手送個仔返學放學，呢邊又冇地鐵就算坐巴士都要轉七次唔可以下下麻煩嫲嫲或婆婆幫手接送去學呢學路，結果凡事都要親力親為，難為了阿媽。又雖然為咗要送小朋友去呢度學呢嘢同去嗰度學嗰樣，被迫要日日同老闆夾Schedule，又或要放棄參與恨咗好耐嘅私人活動，但一切都係值得的。因為小朋友長大得實在太快，當你覺得可以留番聽日先照顧佢，原來，聽日響不知不覺間已經嚟到，而你個膝豆窿，亦係毫無預告下突然變咗個巨人，佢唔洗你照顧乜劑，反而可以照顧返你......
正正因為與同事嘅呢番對話，令雷震拿無情白事感觸起嚟。當然，突然發現個仔大個咗，係會有啲啲思絮混亂思潮起伏，不過最大感觸，其實係感恩，感恩我冇浪費到陪伴佢成長嘅呢十幾年時間。移民十幾年，不斷有香港朋友同我講：「你好嘢！決定得早！」又或：「你就好！唔洗受氣！」，同埋：「真羨慕你！我都想移民！」雷震拿只係想講，各有前因，各懷背景，冇邊個係須要羨慕另一個，深信神為我們安排的就是最好。我說感恩，當然是感謝天父將我帶來呢個家，感謝祂當年幫我作出呢個決定。但當朋友奇怪/佩服/羨慕雷震拿可以放棄香港看似美好嘅一切嚟到一個完全唔知係乜嘅地方重頭開始，我只係想講：「有失必有得，所以很公平，有得亦自然會有失」。性格使然，基本上雷震拿唔會點去點算自己的損失，因為呢個世界最Stupid嘅問題，就係：“What If”。反而我最愛數算神恩典，所以「得」呢方面，我比較有心得，深信兼銘記因為移民，令我可擁有的美好一事與一物。其中一樣，就係可以親身見證陳憧憧成長，給予他一個快樂的童年，以及每天車出車入與他談天（或教訓）與說地（及督責）。
時間一日一日過，眨吓你對惺忪睡眼，呢啲寶貴嘅歲月就會偷偷溜走。轉眼間，困身的小孩子已成為安坐軚盤後的小司機。雷震拿仍然享受為我家孩子車出車入的迎送生涯，同時亦正學習做好導師角色，陪伴他經歷學車歷程。正如我同事講，個廿幾歲嘅仔如果問：「Mum，可唔可以麻煩你車我呀？」，做阿媽嘅我哋一定唔會嫌麻煩：「車車車！冇問題！」唔好唔記得我哋係專業人士，專業接送，我哋咪就係俾你哋特訓出嚟㗎囉！
0 notes
Text
九個女人遊東京
一切由雷震拿一個瘋狂想法開始。
話說幾個月前收到通知，協恩同學會出年Easter聚一聚慶祝30周年，My Goodness! 既然畢業30年係不變事實，去又係卅年，唔去又係卅年，咁梗係去見吓班老朋友，大家吹吓水聚吓舊總算係張大合照度有份伸個頭埋去先夠開心呀！但問題係出年陳憧憧考VCE，冇得外遊，鬍鬚佬又事業為重，應該唔會拍乸住我齊齊返香港，咁雷震拿一支公OK嗎？特立獨行嘅我，當然冇問題，但專程飛返轉香港只為出席同學會，總覺有啲欠缺...... 如果可以順道去個Trip，咁就Perfect啦！
於是雷震拿大膽向班姊妹提出：「你哋咪成日話想跟我去日本嘅？想唔想出年3月同我去旅行呀」
「Yeah！」
「好呀！」
「正！」
「我去！」
反應非常熱烈！真係差啲連報名張Form都印唔切......
不過熱鬧一輪，璀璨歸於平靜，除咗一位忠心不二同為日本Fan C嘅姊妹外，其他各位唔知係攞唔到Permit，定係心中有數發夢冇咁早，倒不如不了了之，以免奢望愈大失望愈大...... 其實雷震拿預咗得個講字，要約一班好朋友去旅行其實談何容易？大家又要夾假期，又要老公點頭默許，又要安排細路大小日程，又要預算足夠地點合適，要跨過嘅障礙實在太多...... 發咗個夢兼發咗個邀請就算，得時不得時，已變得冇乜所謂。
點知，原來呢個世界真係有樣嘢叫死灰復燃。
真係要多謝Qantas。
上個禮拜六最後一日eCell完結，大家係雷震拿屋企開完組齊齊食Pizza同Pasta。嗰邊廂成班女人係度高談闊論，突然有人大叫雷震拿過去，隱約聽見：「大家話可以去日本啦！」
因乜無啦啦冷卻的熱情頓時又燒得熾熱？原來因為Qantas做緊Promotion，直航機票平到你唔信，正正因為減價兩個字，成為重燃呢個話題嘅玄機。於是大家拿出電話夾夾時間，發現3月中確係好時機，因為係Low Season，Promotion價適用，加上又未放Term Break，唔洗安排小朋友活動，只要搞掂接送返學同埋一日三餐，假期應該可以順利獲批。而令整個瘋狂想法化成真嘅契機，係其中一位姊妹嘅老公當場金口一開，英王御准，成為第三名加入雷震拿旅行團嘅成員。於是，呢個女人遊樂團便開始成型。
雷震拿通知一眾姊妹，三人成團，呢個Trip已經去得成。至於其他人去，定係唔去，就睇各人嘅安排，同埋申請Permit過程是否順利。話哂各位姊妹嘅小朋友仍然係小學雞，姊妹們仲有好多重責係身，未必可以話放假就放假。
點知一覺醒來，去到教會，首先有第四個姊妹同我做勝利手勢，話「OKOK！我可以Join你哋去日本啦！」然後完咗Church又聽見另一位姊妹話：「我LK俾我去呀！」屈指一算，即係有五位團友啦。到雷震拿行落樓梯見成班姊妹圍埋大聲講大聲笑，原來一位原本話要陪阿媽嘅姊妹話已經安排妥當，而另一位阿媽錫哂嘅姊妹仲由阿媽出面幫佢報名參加呢個雷震拿旅行團添！真係估唔到反應咁熱烈，證明雷震拿除咗Blow Water犀利外，Blow the Chicken都有番咁上下功力。
但呢個唔係故事嘅結局。拉隊去食飯，我問其中一個小朋友：「你媽咪去Japan喎，你OK嗎？」佢點頭話冇問題，而佢身邊另一個細路都話：「OK呀！我俾我媽咪去呀！」咦！團長唔知道你阿媽報咗名喎！於是雷震拿轉個頭同呢位小朋友嘅家長講：「你老公批准你去咩？」呢位姊妹笑笑口回應：「係呀！佢叫我唔好帶個喼去喎！」
如是者，三人成團變成某人老公口中嘅八仙過海。但故事仍然未完。第二日當要請假嘅姊妹成功同公司攞假後，各單位即時啟動作戰方案，要係Qantas截Promo前買飛過數，而我哋呢個日本團亦成功落實，由得個講字變成有票揸拿。正當各位買好飛嘅姊妹話題開始由搶機票變成住邊度，呢個時候，從來冇正式響兩日會議露過面嘅四嫂，正式宣佈：「我都攞咗Permit啦！」
一個人的瘋狂想法，經歷兩個人的孤寂冷漠，再到三人成團的夢想成真，最終變成九口出動嘅東京之旅，過程實在太夢幻、太興奮、太奇特、太感恩了！感謝天父爸爸的保守帶領，這得來不易的旅行團，全因祂才能成事。最奇妙的是過程中各位姊妹的互相協調與搭配，非常體諒與坦誠，實在美妙得難以令旁人置信。短短幾日，我哋已經訂好酒店，下一步係提前擬訂行程，令九人早作準備，繼續互補不足，了解大家需要。所以雷震拿同班姊妹講，我要記低成個過程同感覺，因為實在太奇妙！你知啦！同學會都30年，好多嘢好易唔記得，趁家陣興高采烈，要捕捉當下真實感受，用文字記錄下來，讓我好好牢記天父爸爸奇妙的帶領與安排。
是日圖片：九個女人都未啟程，點會有相片分享？所以雷震拿搵返呢張同陳憧憧嘅舊照。原因？我哋九個，揀定呢次Trip要住呢間對住彩虹橋嘅Hotel Nikko。
0 notes
Text
金石良書
如果你同雷震拿一樣咁Old School，在日常捽機快速吸收即時資訊之餘，其實最喜歡的，還是實實在在地手拿起有封面有內頁有混雜印刷味道滲出淡淡紙香的一本書，請隔空同我來一個擊掌。
雷震拿絕不是書蟲，平日生活也忙碌得難以學效某位即將退位的局長般周讀N本書，但仍然強迫自己拿起實體書閱讀，增進知識也好，純粹消閒自我感覺良好也好，提升靈命學習神話語也好，開卷有益，確是金石良言。所以移民初期，對於未能便捷入貨，確是有點遺憾。曾光顧商務網上書店cp1897，但總消費非常昂貴，後來經好友NEC推薦，雷震拿便定期在台灣品牌金石堂訂書。喜歡金石堂除了因為定價超級便宜外，更因她藏書量極廣，不少罕有的書刊也有存貨，反而從前幫襯開的香港書網選擇較少。但有一點要注意，運費不便宜，每次我都要心理調校，大概總消費要係書價嘅Double，但整體比較，仍然合理 --- 反正Melbourne沒有Kinokuniya，即使我在Sydney店買，最後定價也與網購相差不遠。
這次因為9月份歐遊行程有變，決定將原有的蘇格蘭+捷克之旅，修正為純東歐三國再加瑞士回程，所以又要追加Mook指南（金石堂最正係有齊所有Mook天書，返香港搵反而成日搵唔到想去嘅目的地）。既然一場上網，當然順便又睇吓有乜合眼緣新舊書，結果真的讓我又看中了兩本日文工具書，同埋雷震拿最愛的Horrible Histories系列。凡係涉及歷史的書籍雷震拿都有興趣，而「恐怖的歷史」風格最破格最搞笑，最得我歡心。結果這次專程為去旅行搵書變成最終買夠九本買單，Online Shopping咪就係專做我呢啲忍唔到手嘅消費者生意㗎囉！
不過今次幫襯金石堂，真係嘔咗三桶血，從來冇試過。連續幾日網訂書籍後準備俾錢，填好哂資料先出現「網絡擠塞，請容後再試」字樣，咁究竟你有冇過到我數呢？查狀況又睇唔到乜嘢玄機，Send問題只回覆叫我再訂過，但所有係購物籃裏面已選擇嘅書籍全數消失，又要我逐本搵番。除咗手續繁複厭惡極度講求耐性外，問題係...... 每次再搵又會咁橋撞啱多一本合書緣嘅名字，咁又Click多一本放落個籃度，結果係點？咪就係愈買愈多囉！（推卸責任Tone，haha!）
終於試足四日順利完成交易，竟然又要等成個幾禮拜先收到最後郵件。我知個幾星期好快㗎啦，不過上次訂書真係「啜」一聲就到，新鮮熱辣，將我寵壞！所以當今次望穿秋水終於平安收到個包裹時，雷震拿真係開心哂，開心到一個程度，係要立刻寫篇Blog紀念佢，Jot低呢份感覺。家陣好舒暢！
0 notes
Text
少年人的成長
要感恩的事實在太多，而經常掛在雷震拿口邊的，必定是「感謝天父爸爸為憧憧揀選了一間好學校」。這學校好的地方，不只是師資及校風、成績及設施，而是作為家長，我真心感覺到學校花了不少心機、資源與注意力，關注這群大男孩的真正需要。一間學校可以狂谷學生操到佢哋科科都掂，亦可以源源不絕提供音樂體育戲劇藝術等等數之不盡的學習機會務求學生全能All Round，但如果這學校漠視培育一個有禮貌、懂尊重、愛別人、敬社會的中學生，任這間學校VCE年年出產100個99.99分，也是徒然。
雷震拿有感而發，全因陪伴著陳憧憧由活潑好動的童年，邁向心理變態的青少年，幾經磨練，雖不至於百毒不侵，但總算是身經百戰的青春期媽媽（一個面對青春期仔女就嚟更年期嘅阿媽）。感恩的是我家孩子天性活潑健談愛運動，所以沒有宅男的鬱結，亦感恩在我們的青春期對更年期磨合間，天父不斷指引，教導我如何站於孩子的角度，在督責、指導、分析、鼓勵及體諒中取得平衡，兩母子習慣以「溝通」及「坦誠」作為化解問題與矛盾的方法，令這個青春期風暴，尚算平穩過度中。
說回學校的角色。剛完成中期考試，學校宣佈將昨天定為BODi Day，這簡稱來自學校的拉丁文校訓縮寫，而這個白天針對學生、晚上要求家長一同參與的特別活動，目的是要讓這群Year 11的男生"To be a good man"。Good這個字其實很抽象，亦可以很主觀，你的好在我的眼中，可以只屬於世俗得很的一個平平無奇。但雷震拿對於學校刻意安排一天Conference，邀來著名心理學家主講、研究、交流、分享，非常欣賞。孩子告訴我Conference很有用，獲取很多資訊，亦更清晰明辨一些是與非。這不是硬把一堆價格觀強塞入他們那不大不小的腦袋，而是讓這群大男孩知道這世界究竟出現了甚麼問題，讓他們去思考，再想想究竟自己應如何自處。
憧憧說白天的主題包括：Respect，學懂尊重。這課題涵蓋的範圍很廣，但最令我感興趣的竟包括Social Media及Pornography。講員與學生分享了一些數據及真實案例，讓他們思考何解有人會濫用社交媒體來欺凌別人，從而讓他們懂得如何達致尊重，在自己使用Social Media時，自然會表現出應有的禮儀來。至於色情網絡，令人震驚的是原來早於2011年，平均接觸Pornography的學生年齡已下降至只有11歲，專家估計五年過去，不排除此數字已進一步降至8、9歲。講員與學生分析了沈迷色情影像的禍害，指出了一個Big Picture：「沒有了尊重」。這不只是對女性不尊重，更加是對你日後的伴侶不尊重，皆因沈迷之輩，腦裏想著的從而投射的，全是扭曲了的價值觀，已失掉了對別人對伴侶應有的一份尊重。
除了Respect外，其他主題還有：情緒管理（即係自我控制）、社交聯繫（即係唔好做宅男）、Nutrition等等。到了晚上，家長加入，課題主要環繞Relationship關係。講員提醒家長與子女維繫良好關係的重要，而當中分享了很多心得，例如：愛（Love is spelt as T-I-M-E）、體諒（代入孩子，感受他的感受）、Set Limit（孩子會明白：Yes! These are all GOOD rules!）、Turn to him but not turn against him 等等。
散會後，雷震拿與陳憧憧分享感受，赫然發現雖然雷震拿唔係心理學家，但原來一路用緊嘅方法正正就係呢位專家嘅推介，只可以講：感謝聖靈帶領，讓我在過去跌跌撞撞的青春期媽媽歷程中，默默地走對了路。憧憧則讚我在Empathy呢方面做得好好（多謝哂喎！），而我則提醒他，要感恩自己從小信靠主耶穌。我不懂教孩子，我只是學習用聖經的教導來教導他，如今考證，竟然與親子專家的心得吻合非常。真的，每個孩子都像個寶，不管是6個月大、6歲、16歲、26歲還是66歲，都是天父爸爸眼中的瑰寶。讓我們靠著神，代祂管教每個托管在我們家的孩子吧！
0 notes
Text
學神憧與教官媽
不知不覺，雷震拿寫Blog已經有十年了。十年前，出現在墨爾本的太陽裏的陳憧憧是個淘氣可愛搞笑又充滿童真的小朋友，十年過去，變身巨人中學生的他，想不到，已經安坐軚盤前，準備向司機之路進發了。時間，總是在你不為意或嘻哈或淚流中度過...... 唔好提我乜嘢叫做皺紋同更年期。
Victoria的考牌制度將學神歸類為Learner，年滿16歲就可以申請，基本上通過筆試後就可以即場係VicRoads影張相出個Learner牌過你。有咗呢張車牌，就可以正式學車，但最快要到滿咗18歲個日先可以考路試同電腦試。換句話講，就算你踏正Sweet Sixteen當日攞到Learner Permit，都要等足365日x2先可以變身P牌仔。
雷震拿唔記得邊個年齡係條界線（21、22？唔太肯定），總之係呢個年齡前考路試，規定你一定要儲夠120個鐘先可以考牌，相信理由係確保年紀小的學神要累積足夠訓練同駕駛經驗。過咗呢個年齡後則不受120小時規定所限，所以我知道有啲人選擇遲啲先學車，咁學費同鐘數都可以慳番。
不過雷震拿係奉行「早學」概念嘅家長，理由係：「延長子女學習駕駛、掌握技巧嘅時間」。兩年係非常好的學習歷程，可以俾呢班青春期有足夠時間練習，加上你諗吓，當你個仔女有車牌在手，基本上佢可以舞住架車四圍走，到時阿爸阿媽你先企係屋企門口度吟哦嘮叨提佢小心啲揸車，阿貴公子都已經踩油啜一聲飄咗去......
所以雷震拿深信，要教導孩子駕車技巧同埋正確嘅駕駛態度，最佳位置，係坐係司機位隔離，而唔係企係屋企門口。
事關係澳洲學車，唔一定要跟師傅，任何一位坐係司機位隔離嘅Full Licence都可以做Supervisor，而Supervisor係有責任教導學員同確保安全。
陳憧憧係Learner新牌仔，雷震拿都係Supervisor新牌仔，起初有點抗拒，因為擔心自己未能勝任，但由於想阿仔開頭先練熟我部細車，而鬍鬚佬通常揸住佢部大車四圍走，冇乜幾何可以訓練阿仔，所以雷震拿最後都係鼓起勇氣，向左移，騰出司機位俾陳憧憧。每次開車前我哋都會祈禱將整個車程交俾神，求佢俾智慧、判斷力同冷靜頭腦俾阿師傅同學生。
做咗一輪Supervisor，感謝天父爸爸，雷震拿覺得自己都幾適合坐係呢個位置，因為我其實幾冷靜，起碼唔會怪叫，或失驚無神大罵，反而可以指指點點簡潔俾指示，遇到學神憧犯錯又可以清晰指出佢問題所在，但唔會神經緊張地亂咁鬧。而作為坐係司機位隔離嘅師傅，雷震拿堅持傳授俾陳憧憧嘅唔單只係駕駛技巧，更重要嘅係駕駛態度。一架車揸出街唔單只係代步工具，駕駛者更係道路使用者，而每一位道路使用者都應該獲得公平而安全使用道路嘅權利。無論係坐係軚盤前嘅司機，定係揸住兩個轆嘅單車友，抑或係過緊馬路嘅行人，都應該為其他人可以公平安全地使用道路而負上責任。
呢個就係冷面教官雷震拿奉行嘅宗旨。
0 notes
Text
墨爾本的甜品
有人喜歡辣，亦有人喜歡苦澀與酸鹹，而雷震拿，天生一張甜嘴兒，最愛鮮味甘甜，甜品是我的飛弗。應該係遺傳。
雖然喜歡甜，但並不是所有甜品也能讓我撲通一聲去嘗試。基本上雷震拿只愛西式Dessert，對中式甜品不太欣賞。而西式甜味中，較愛蛋糕，尤其是質感幼細、外型悅目的新派製作。對於這張有特殊偏好挑挑剔剔的甜嘴，能夠在墨爾本生活，實有太太太幸福了！因為Melbourne的美麗糕點，真係試極試唔完。
大概七八年前吧！雷震拿招呼嚟自香港同樣嗜甜的Best Friend，可惜當時我的甜品之旅仍未起飛，仍然係尋尋覓覓階段，唔識得帶佢去搵食，只可以試到一啲個樣又核突啲味道淨係得「死甜」二字嘅出品，失望而回。家陣唔同啦！如果再款待呢位貴賓，雷震拿將會有一個List嘅Must Eat Dessert同佢逐間去試，阿Best Friend唯一要擔心嘅，應該係去完呢個旅程後，條褲仲著唔著得落！
1) Chez Dre & Bibelot
係我食過咁多間嘅Melbourne出品，最愛，始終係法式Chez Dre。頂頭張大相就係我同呢個品牌成排法國蛋糕嘅快樂合照。呢間位於South Melbourne嘅Cafe其實環境同食物都非常正，後尾索性係大街開多間Bibelot，專做甜品同Gelato，一樣咁好食。雷震拿愛佢外在美內在美兼備。讚！
2) Zumbo
我個飯腳話Zumbo其實唔係咁好食啫，我唔同意，因為佢嘅出品，都係雷震拿最愛嘅幼滑口感配靚靚外觀。Adriano Zumbo係澳洲最出名嘅甜品師，真人幾靚仔㗎，不過冇頭髮，只得35歲嘅佢，N年前已開專門店，家陣分店已遍佈Sydney同Melbourne。雷震拿最鍾意Zumbo嘅得意Idea，例如紅色多眼仔，真係好Cute，可惜已經Discontinued。
除咗Cafe同櫃檯外，Adriano Zumbo仲係South Yarra整咗間Fancy Nance專做Weekend High Tea，招牌Dessert就係我手上面呢款成個紅色炸彈嗰個脆波波。
3) Crux & Co
後起之秀有兩個，一個就係Crux & Co（City同East Melbourne），主力製作迷你Size兼不同口味嘅Eclair。因為有Eclair，所以我當埋佢係法國系，自然加咗印象分。
舊年聖誕雷震拿買過佢嘅Christmas Edition，感覺唔錯，不過始終去唔到Chez Dre嘅水準。
4) LuxBite
另一個新力軍係LuxBite（South Yarra & City），甜品師嚟自馬來西亞，因為鬆弛熊蛋糕同Hello Kitty Macaron起朵。上個禮拜雷震拿終於的起心肝去試，South Yarra總壇俾到我嘅感覺有少少失望，糕點選擇不算多，遠睇吸引近睇好多瑕疵，凹凸不平要扣分。不過蛋糕Combination有創意，對我嚟講係走Zumbo風格，令你望住件Cake一路食一路諗究竟係乜味加乜味，極具新鮮感。
5) Black Star Pastry
呢個牌子嚟自Sydney，甜品師個樣係Asian Face，姓氏似越南姓，未有印證。因為一個超靚嘅Strawberry & Water Melon Cake被喻為Most Instagrammable蛋糕，所以嚟Melbourne開Pop-up立刻個個去朝聖。講真，Black Star嘅Cake唔係雷震拿喜歡個款，因為口感比較粗，但勝在一個字：靚！而且食材新鮮，既係好Fresh嘅新鮮又係好Creative既新鮮。好似個西瓜蛋糕咁，竟然有份玫瑰香，估你唔到。左邊個荔枝都好好味，不過下面個無花果香橙麻麻地，上次再試過開心果檸檬，可以不理。
其實除咗以上推介外，Melbourne仲有好多甜品選擇，雷震拿一係未試勻，一係食完覺得可以放埋一邊，唔洗翻兜。冇相分享但真心鍾意嘅，係簡簡單單嘅Nutella Banana Crepe，又係法式，平時行過City嘅Swanston Street街邊檔，如果個肚未食到爆開兼夾個檔口前未排滿人群，都會懷念懷念Order一份。至於專用嚟呃Like嘅針筒Doughnut我未試過，但我知自己唔會鍾意，因為可以幻想只剩下兩個「死甜」字。馬卡龍Macaron亦係可免則免，如果你始終唔明乜嘢叫「死甜」，麻煩你自己Order一件食完自然完美演繹。另一個呃Like之選Crazy Shake，真係可以當Lunch食，飲完飽到滯，不過雷震拿未試過自己完成一杯，因為實俾陳憧憧整杯KO哂。
0 notes
Text
老墨睇話劇
做咗11年老墨，覺得墨爾本最可愛最出名最方便嘅，除咗有好多超型格超有個性超注重咖啡品質嘅Cafe（對唔住又要Make多一次呢句Statement: Starbucks，請你企埋一邊），同埋好多超好味超有創意兼超正宗嘅各國風味美食外，其實有一樣嘢係Melbourne冇乜點大肆響國際舞台上宣傳，但其實以雷震拿目測兼用雙腳走勻過嘅大都會屈腳指一算，絕對能榮登世界三大之列嘅 --- 燈登燈櫈，就係睇Musical啦！
講起蜚聲國際音樂劇，即係大家認知嘅例子，如：Les Misérables孤星淚、Phantom of the Opera歌聲魅影等等，第一時間聯想嘅必定係美國紐約百老匯Broadway同英國倫敦West End。無可否認，呢兩處劇院雲集、有數不盡嘅歌劇話劇音樂劇同一時間上演嘅Theatre區，絕對係首屈一指，但如果凡事有冠亞軍就必定有第三嘅話，雷震拿敢講，做季軍嘅，一定係Melbourne。
我話嘅！
墨爾本嘅劇院數目可能比唔上New York同London，同一晚上演嘅劇目或者唔超過十齣，但世界名劇同樣天天公演，每一齣噏得出嘅新舊佳作，必定曾經係或將會係Melbourne公映，有不少新作更會刻意揀墨爾本作為Broadway或West End以外全球首演城市，例如Phantom嘅續集Love Never Dies。正正因為呢個優勢，雷震拿呢幾年都培養咗睇Musical嘅興趣，當然我唔係大癮到逢劇必睇，我都冇乜藝術同音樂嘅慧根，純粹鍾意欣賞現場表演享受認真製作，兼夾...... 湊熱鬧囉！先後響Melbourne睇過嘅劇目包括：Les Miz、Lion King、Matilda、Kinky Boots等等，仲有本土製作King Kong同埋麻麻地嘅Ghost the Musical。嚟緊已買咗飛睇Aladdin，期待新一浪驚喜。
除咗Musical外，Melbourne各大劇院更時常公映不同話劇&喜劇，一年一度嘅Comedy Festival亦都啱啱開鑼。不過劇場版嘅喜劇並唔係雷震拿杯茶，始終文化差異，就算我聽得明每一粒英文字，但作為笑話將啲字串埋一齊聽一遍，我真係領略唔到個笑點，話哂雷震拿都係睇周星馳大聽慣黃子華同林海峰嘅港式棟篤笑。不過早排一知道West End個齣The Play That Goes Wrong衝出英國，選擇響Melbourne作為英國以外全球首個公演地，雷震拿決定約埋好大癮做Drama嘅陳憧憧一齊去Comedy Theatre棒場，作為我首個欣賞不含音樂元素嘅純英語話劇（阿仔有份參演嘅學校演出不計算在內 --- 唔好睇少佢哋呀，學校Drama好十分超級有規模，製作極其認真，佢學校有全職員工負責個舞台㗎！）。
呢齣俾我改咗個中文名叫《超錯》嘅Comedy，確係笑位百出，賞心悅目，不過正如雷震拿一早作出嘅Disclaimer，基於永恆不變的文化差異，其實有好多笑位同形體動作對我嚟講只係硬笑話，笑點其實唔算高，反而有時齋聽現場觀眾嘅笑聲仲好笑。有好幾次雷震拿望住個台唔識笑，但聽見前後左右個啲收唔到掣嘅笑聲，自己都忍唔住漏咗啲笑氣出嚟。可見格格格嘅歡笑聲，真的充滿感染力！
笑位雖然唔合我脾胃，但雷震拿對《The Play That Goes Wrong》嘅舞台製作就非常臣服，簡直嘖嘖稱奇。點解啲跌嘢位可以咁精準？點解啲傾斜度可以掌握得咁細緻？負責舞台、道具同跟出跟入嘅上下團隊，俾十個Like你！
仲有一個幽默位：門口放咗一張Tom Cruise嘅相，寫到明：佢冇份演出㗎！問你笑未？
0 notes